Sundalo sa 29th IB namusil ug sibilyan
Gitusak-tusak sa upat ka mga bala ang dughan sa usa ka biktimang lalaki dihang gipusil kini sa suspek nga usa ka sundalo kinsa sakop sa 29th IB Phil. Army.
Gideklarang patay ni Dr. Cecelio Cumba sa Butuan Medical Center (BMC) ang biktima nga si Dominick Salahay, hingkod ang edad ug residenti sa Purok 5, Brgy. Anticala sakop ning dakbayan sa Butuan.
Ang gitumbok nga suspek giila nga si Pvt. Erick Salahay, 24 anyos ug sakop sa 29th IB Phil. Army kinsa nadestino sa Tagkiling Patrol Base sa Brgy. Anticala ning syudad sa Butuan.
Nigawas sa imbistigasyon nga bandang alas 8 ang takna sa gabie nagdula ug billiard si Pvt. Salahay sa tindahan nga gipanag-iyahan ni Anna Marie Balcuria.
Kalit lang miabot ang biktima nga si Dominick kinsa langu sa Vino ug gisulayan pag-ilog ang armas nga gitakin sa hawak sa suspek. Gibadlong pa kini apan subli na usab nga gibuhat ang pag-ilog sa armas mao’ng wala kapugong ang suspek ug gibunot ang iyang kalibre .45 nga armas dayo’g pusil ka-upat ka higayon punting sa biktima.
Gitusak-tusak sa bala ang dughan sa biktima nga milahus sa likod hinungdan sa iyang kamatayon.
Human sa krimen, daling miiktad ang sundalo ug padayong gilusad karon sa Police Station 4 ang hot pursuit operation batok sa misibat nga sundalo.
with report archer capadeso/ ivy falcone
