Patay ang usa ka sundalo sa Army human kini gipusil sa wala mailang armadong lalaki, pasado alas-2:00 sa hapon kagahapon sa Basak Malutlut, Marawi City.
Giila ni Colonel Thomas Pantaleon, hepe sa Marawi Police, ang biktima nga si Staff Sergeant Lito Polines, kinsa na-assign sa 553 Engineer Battalion, Philippine Army, nga naka-base sa Barangay Moncado Kadingilan sulod sa ground zero.
Ang Army engineers maoy katabang sa bomb clearing operations sulod sa most affected area aron masugdan ang aktuwal nga rehabilitation and rebuilding sa Marawi human ang siege niadtong 2017.
Sa inisyal nga imbestigasyon sa pulis, sakay si Polines sa iyang motorsiklo dihang gipusil kini sa suspek nga gilayon ra usab misibat sakay sa motorsiklo sa biktimang sundalo.
Dala usab sa suspek ang sling bag ni Polines nga gituohang anaa sa sulod niadto ang service firearm sa biktima.
Gidala pa sa labing duol nga tambalanan ang biktima apan gideklara kining dead on arrival.
Usa ka basiyo sa bala sa kalibre 45 ang nakit-an sa dapit kung asa nahitabo ang pagpamusil. (Divina M. Suson)
