Zamboanga del Sur – Wala’y natalang casualty sa habig sa kasundaluhan human ang 21-minutos nga engkwentro sa may utlanan sa Brgy. Buenasuerte ug Brgy. Laperian sa lungsod sa Tukuran ug didto usab sa Brgy. Dipaya, Labangan tali sa mga rebeldeng New People’s Army kon NPA. Sigon ni Lt. Col. Jo-ar Herrera, Commanding officer sa 53rd Infantry Battalion, Philippine Army, nakadawat sila og tip gikan sa mga residente kalabot sa presensya sa maong grupo hinungdan nga ila gilayon kining girespondihan.
Nahipos sa kasundaluhan sa encounter site ang duha ka tent,usa ka sako nga uling, mga basiyo sa bala sa AK47 ug M16 lakip ang mga sundlanan sa pagkaon. Nagpadayon pa ang pursuit operations sa kasundaluhan aron masuta kung duna ba’y casualty sa habig sa mga rebelde nga gibana-bana nga moabot sa 15 ka indibidwal.
Dako ang pagpasalamat sa opisyal ngadto sa katawhang naghatag kanila og saktong tip rason nga daling misibat gikan sa maong lugar ang mga rebelde.
