General Santos City—nagkainitay ang Pulis ug usa ka sundalo sa check point nga nahimutang sa Roundball, diversion road, Barangay Sinawal, Gensan niadtong adlawng Domingo.
Una nang mireklamo sa Police Station 2 ang pulis nga si Sr. Inspector Riza Santos nga nakabasi sa Sultan Kudarat human matud pa sya nga gitutukan ug pusil sa sundalo nga si Corporal Montefalco nga nakabase sa Joint Task Force Gensan.
Subay sa reklamo niini gikan siya sa sultan Kudarat ug padulong unta sa Police Regional Office-12 aron magpasa ug mga dukumento. Tungod nagdali, gi-hazard sa nahisgutang pulis ang iyang sakyanan aron nga dili na siya sitahon. Apan pag abot sa Check point siya gisita gihapon sa sundalo mao nga sila nagkainitay.
Basi usab sa interview sa RMN News Team ngadto sa mga sundalo nga nakabase sa Check point niadtong higayona, ilang gibutyag nga hugot nga siguridad ang ilang gipatuman tungod sa pagbisita ni Pangulong Rodrigo Duterte dinhi sa Gensan atol sa adlawng natawhan ni Sen. Manny Pacquaio.
Samtang taas ang pila sa mga sakyanan nga ilang ginainspection sa Checkpoint ilang namatikdan ang usa ka sakyanan nga naka-hazard. Gilayon nga gisita ni Corporal Montefalco ang driver niini diin nahimo pa nga arogante ang driver nga si Police Inspector Santos.
Didto na kini nagpaila nga siya usa ka pulis, apan sumala ni Montefalco nga sila sa Joint Task Force Gensan nagtuman lang sa ilang tahas nga pag inspection sa tanang mga motoristang magsulod sa syudad.
Gihimakak usab sa mga kaubanan ni Montefalco nga gitiunan sa nahisgutan ug pusil ang pulis. Sa karon naghimo na ug makuting imbistigasyon ang Police Station 2 kalabutan sa insidenti.
