Davao City – Giinbestigahan karon sa pamunoan sa 10th Infantry Aguila Division Phililippine Army ang duha ka lalaking gitohoang naggamit sa fake ID sa militar human nadakpan sa buy bust operation sa PDEA-XI sa syudad sa Tagum.
Sumala ni 10th ID spokesperson Army Capt. Jerry Lamosao, gipailalom na karon sa inbestigasyon ang usa ka Cpl. Cristituto Macagubang, sakop sa 3rd Infantry Division Phililippine Army nga nakabase sa Malagos, Baguio District syudad sa Davao. Matud ni Lamosao, sila si John Louie Segovia ug Alvin Binondo mag-atubang og laing kaso kung mapamatud-ang migamit sa peke nga ID.
Kahinumdumang nasikop sa buy bust operation sa PDEA-XI sa Tagum City sila si Cpl. Cristituto Macagubang , John Louie Segovia, Alvin Binondo, Cafgu Rey Mission ug Regie Impas, usa ka civilian asset.
Nakuhaan sila ug droga (shabu) nga mibalor sa 75-mil ka pesos, bala ug usa ka .45 kalibreng pistola. Ang mga dinakpan gikustodiya karon sa PDEA-XI aron pasakaan og kaso.
RadyoMaN Bernard Pantallon
