General Santos City—Wala nay lockdown pa nga mahitabo sa General Santos sugod karong Disyembre 6 adlawng domingo.
Kini ang gikumpirma ni Gensan City Mayor Ronnel Rivera human ma-aprubahan sa City-IATF ang pagtanggal niini. Matud ni Mayor Rivera nga ilang obserbahan ang mamahimong reaksyon sa katawhan hilabina nga pipila na usab ka bulan nga gipatuman sa Gensan ang Sunday No Movement. Panghinaot sa Mayor nga magpadayon gihapon ang pagtuman sa katawhan sa minimum health protocol sama sa pagsul-ob sa facemask, faceshield ug ang physical distancing hilabina nga mag-abli na usab ang mga dagkong mall.
Dugang pa sa Mayor nga lakip sa nasabutan sa gipahigayong meeting sa Local IATF mao ang pagpabilin sa curfew hours gikan alas 12:00 sa tungang gabii ngadto na alas 4:00 sa kadlawon, apan adunay ihatag nga exception sa pagsugod sa simbang gabi. Samtang gibutyag ni Mayor Rivera nga suspendido ang curfew sa Disyembre 25 atol sa pagsaulog sa kapaskuhan ug sa Disyembre 31 dungan sa pagsugat sa bag-ong tuig. Samtang giklaro niini nga tanang ginadili nga gi-implementar karon sa dakbayan ang pwedeng tanggalon o ibalik depende sa datus sa kaso sa Covid 19.
