Human na nahimong kontrobersiyal an tag-ija sa Patrick by the Beach Resort sa Siargao, Surigao del Norte sa online advertisement niini na nag-awhag sa mga langyaw na mobisita sa Siargao na moresulta na may mapares sila na mga babaji o morag nag-promoter nan sex tourism.
Tagpanguyuhan ni Boardmember Fernando Larong an sunod-sunod na pagpasar sa resolusyon. Una, an pag-awhag sa Committee on Tourism ug Committee on Laws and Ordinances/Legal Matters nan Sangguniang Panlalawigan sa pagpahigayon nan administrative investigation sa isyu. Human sa pagpahigayon nan imbestigasyon, kon may mapamatud-an, an pagmando sa Prov’l. Tourism and Cultural Office sa pag-Blacklist sa Patrick by the Beach Resort ug Patrick’s Cloud 9 Resort lakip an iban na mga establisemento na tagpanag-ija ug tag-operate ni Andreas Mikoleiczik. Ikaduha, an pagmando ngadto sa LGU nan Brgy. Catangnan ug Brgy. 3 sa Gen. Luna sa pag-revoke sa brgy. clearance sanan business clearance sa amo na mga resorts niini. Ikatuyo, an pagdeklarar kan Mikoleiczik isip Undesirable Alien.
Dugang pa an pag-awhag sa Prov’l. Prosecutor’s Office sa paghimo nan imbestigasyon kan Mikoleiczik sa paglapas Republic Act 9208 o an Human Trafficking Law sa 2003. Taghangyo isab an Dept. of Justice pinaagi sa Bureau of Immigration sa pagbutang kan Mikoleiczik sa watchlist samtang nagpadajon an imbestigasyon.
