General Santos City— Dili maka-alarma ang sunod-sunod nga pagka-rekober ug mga Improvised Explosive Device kon IED sa rehiyon. Kini ang gibutyag ni Police Superintendent Aldrin Gonzales, tigpamaba sa Police Regional Office 12.
Sumala niya nga dili na bag-o alang sa rehiyon nga maka-rekober ug mga eksplosibo kung asa dakong tabang matud pa ang impormasyon gikan sa katawhan. Pagpasalamat niya nga naga-cooperate na ang katawhan sa pagbantay sa siguridad rason nga wala nagamalampuson ang dautang plano sa ubang grupo.
Dugang pamahayag ni PSupt. Gonzales nga sa karon dili pa nila makumpirma nga mga miyembro sa rebeldeng Bangsamoro Islamic Freedom Fighters kon BIFF ang responsible sa pagbilin sa maong mga IED.
Apan iyahang gibutyag nga mas hugot nga pagbantay sa siguridad ang ginahimo sa kapulisan uban ang militar aron masigurong dili na kini masundan pa.
Pagpaklaro niya nga kanunay nga anaa ang mga bahad sa siguridad busa padayon ang ilahang panawagan sa katawhan nga tabangan pinaagi sa paghatag ug impormasyon.
