General Santos City—Tulo ang angol sa nahitabong duha ka sunod-sunod nga pagpanunggab ug pagpangulata nga nahitabo sa Silway Bridge, sakop sa barangay West, Gensan.
Unang nadunggaban ang biktimang si Faisal Safayani, 18 anyos nga taga Purok Kulasi, Barangay, Labangal Gensan alas 11:00 ang takna sa gabie. Subay sa pahayag sa amigo sa biktima nga si Kenti, gikan sila sa biktima sa Purok Kulasi ug padulong unta sa Silway Talipapa apan pag abot sa tulay nga bahin duna matud pay duha ka lalaki ang kalit miduol kanila dayon sila gidunggab.
Sumala ni Kent nga wala siya maigo human nakalikay apan naigo sa iyang ilok ang biktimang si Faisal. Paspas nga nanibat ang mga suspek human sa insidenti samtang ang biktimang si Faisal daling gidala sa Dr. Jorge Royeca Hospital ug kasamtangan pa karon nga nagpaalim sa iyang samad.
Samtang alas 12:45 ang takna sa tungang gabie dihang gidunggab sab sa wala mailhing mga suspek ang mga biktimang silang si Alias Jamjamer (Gituyo ug tago ang pangalan), 17 anyos nga taga Purok Kulasi, Labangal ug Raffy John Bayron, 27 anyos, residenti sa Purok Acharon, Barangay Calumpang.
Sa imbistigasyon sa kapulisan nasuta nga gikan matud pa sa Sentrong bahin sa syudad ang mga biktima ug Pauli na unta sa ilang panimalay dihang pag-agi nila sa may Silway Fatima atubangan sa simbahan, sila gibabagan sa grupo sa mga batan-on.
Ang biktimang minor de edad ang gidunggab igo sa iyang likod nga bahin samtang ang biktimang si Bayron ang nakaangkon ug samad sa iyang aping human nga gibunalan ug dakong bato sa mga suspetsado. Paspas man usab nga nanibat ang mga suspek human sa insidenti. Sa karon nagpadayon pa ang gihimong imbistigasyon sa kapulisan kalabutan sa maong insidenti.
(Photo is for illustration only)
