Bukidnon – Padayon nga nagpahimangno ang tinugyanan sa Bureau of Fire and Protection (BFP)- sa katawhan aron nga malikayan ang susama niini nga panghitabo ilabi na sa panahon karong nga grabe ang kainit.
Ang pahimangno sa BFP human sa laing sunog nga niulbo alas 5:30 sa hapon kagahapong adlawa.
Sa interview sa RMN ngadto kang Fire Office 1 Paul Ronulo, information officer sa Malaybalay City Fire Station gibutyag niini nga nahitabo ang fire incident sa Zone 6, Impalambong ning siyudad.
Gipanag-iyahan ni Elmar Jamago Albios ang mao nga balay. Hinoon walay laing balay ang nadamay human nga daling napalong sa kabomberohan ang sunog nga nagbiling ug 10,000 nga damyos.
Pagdaob sa likod nga bahin sa mao nga panimalay ang gitudlong hinungdan sa sunog samtang padayon pang gi-imbestigahan ang insidente.
Kung mahinumduman nga anaa sa upat ka mga panimalay usab ang gilamoy sa kalayo human nga niulbo ang sunog sa P-4, North Poblacion, lungsod sa Maramag sa nakalabay nga adlaw.
Totally damage ang panimalay nila ni Clarita Rebojo, Larry Rebojo, Rito Rebojo ug Emi Anso.
Hinoon wala usay nasamdan o kaha namatay samtang muabot sa 450,000 pesos ang gibana-banang damyos sa sunog.
Padayon nga nagpahimangno ang tinugyanan sa BFP nga magbinantayon ang katawhan aron nga malikayan ang susama niini nga mga panghitabo ug aron dili mamahimong biktima sa sunog.
Sa interview sa RMN ngadto kang FO1 Don Diego sa BFP-Maramag, gibutyag niini nga angayang likayan ang overloading nga pagsaksak sa mga plug ug isirado pag-ayo ang mga LPG.
Nasayran nga karong bulana gisaulog ang Fire Prevention Month diin na-obserbahan nga bisan pa man sa mga pagpahimangno aduna gihapo’y gakahitabong mga sunog.
