Pagadian City – Nikabat sa 150,000 ang gibanabanang damyos sa sunog nga niulbo sa Purok Sandayong, Brgy. Sto. Niño niining syudad sa Pagadian kagahapon sa buntag.
Sa pasiuna nga imbestigasyon Pagadian City Bureau of Fire Protection, dili mominos sa 15 ka mga balay ang gilamoy sa kalayo nga nagsugod sa panimalay ni Analiza Briones.
Ang alarma nadawat sa kabomberohan sa siyudad alas 10:53 sa buntag ug giisa kini sa ikaduha nga alarma.
Dali nga gidakop sa kalayo ang mga balay sa lugar nga pulos gama sa light materials rason nga pag-ulbo sa kalayo pas-pas kini nga nikatap sa kasikbit nga mga balay.
Ang dagko nga mga firetruck naglisod pagsulod sa dapit nasunogan gumikan sa kahagip-ot sa dalan.
Napalong sa mga bombero ang pagkatap sa kalayo alas 11:45 sa buntag.
Walay gikataho nga nakalas sa hitabo apan samaran atol sa pakigbugno sa kalayo ang bombero nga si FO1 Jhujie Pabiran.
Nalusad pa karon og makuti ug inantigo nga pag-usia ang mga imbestigador sa BFP-Pagadian aron masayran ang hinungdan sa kalayo.
