LA CARLOTA CITY – Pito ka mga balay naupos matapos ginlamon sang kalayo sa Purok Mabinuligon kag Purok Mainabyanon, Brgy. Roberto Salas Benidicto (RSB) las 8 sang gab-i, Biyernes Santo.
Duha naman ka mga balay ang partially damage sa amu nga sunog.
Basi sa pahayag sang isa sa mga nasunugan nga si Mrs. Esther Go nga nagahimus sya sang panyapon sang nakit-an nya nga nagadaba daba na ang kalayo sang tupad nila balay.
Gintunaan sang sunog ang gatong sa dapog nga nahulog kag naglab-ot sa kurtina.
Premiro ginsabyahan pa nya ang kalayo sang tubi apang nagdako pa ini.
Ginbululigan nalang nila nga mapagwa ang iya magulang nga nakaagi stroke, tatlo ka motorsiklo, kag ang apat ka mga nakakurong nga ido, kag isa ka kuring.
Magluwas sini wala na gid si Go sang nasalbar nga kagamitan sa diin suno sa iya masobra sa isa ka milyon ka pesos ang balor sang mga nagkalasunog nga gamit wala labot sa ila balay nga may duha ka panalgan.
Samtang totally damage ang balay nanday Bernie Jabonete, Gilda Japitana, Esther Go, Melchor Doner Sr. Diana Gonzales kag King Carrey Chavez.
Partially damage naman ang balay nanday Girlie Juance kag Merriam Enriquez.
Sa interview naman sang DYHB kay Brgy. Kapitan Elmar Aries sang Brgy. RSB, natabo ang sunog samtang nagapatigayon sang prosisyon ang simbahan Aglipay.
Pasulod na sila sa relocation site kag nagpundo sa una nga estasyon sa diin nakita nila nga may dako na nga kalayo kag may nagpahibalo sa iya nga may sunog nga nagaluntad.
Gilayon naman nga nag responde ang fire truck halin sa La Carlota, Pontevedra, La Castellana, Central La Carlota kag Roxol.
Suno kay Aries sang amu nga gab-i mismo nag -abot sanday Cong. Juliet Marie Ferrer kag incoming Vice Governor Jeffrey Ferrer agud maghatag sang bulig sa mga nasunugan.
Nagpadala naman sang mga baldi, blue container nga sulodlan sang ilimnun nga tubig kag iban pa nga mga kihanglanon ang La Carlota City Health paagi kay Marilou Sendico kag Rezan Garcia lunsay mga Sanitary Inspector sang La Carlota City Health Office.
Temporaryo nga nagtinir sa Brgy. Hall kag simbahan sang Baptist.
Nagtigana naman ang Barangay sang tatlo ka mga hulot sa Consuelo Elementary School agud maistaran temporaryo sang mga nasunugan samtang wala pa sila sang masayluhan.
Padayon naman nga ginausisa sang Bureau of fire Protection sang La Carlota City kun pila ang balor sang tanan nga nagkalasunog nga balay kag kagamitan./Grace Supe
