General Santos City—Human gikawatan ang usa ka balay nga nahimutang sa Purok Malipayon, Barangay Labangal, Gensan, gisunog pa kini sa wala mailhing mga kawatan alas 2:00 ang takna kaganinang kaadlawom.
Una nang nagpakitabang sa BFP Gensan ug sa Police Station 2 ang usa ka Tenieza Caballes care taker sa panimalay nga gipanag-iyahan sa usa ka Rolly Dulduco 60 anyos nga taga Gensan human nga gikawatan ug gisunog pa ang gibantayan nilang balay, diin damay pa ang laing usa pa ka balay.
Pahayag niini nga nakamata nalang sila sa iyang bana human nga nakadungog ug lagapak. Dihang ilang gigawas wagtang na ang ilang LPG apan ilang namatikdan nga nagkalayo na ang pultahan nga bahin sa kusina sa balay ni Dulduco.
Paspas ang pagkatag sa kalayo mao nga wala gyoy nasalbar ang mga nahisgutan sa mga gamit sulod sa maong balay.
Nasayran nga dako na kaayo ang kalayo dihang miabot ang mag bombero. Samtang basi sa inisyal nga imbistigasyon nasuta nga kagahapong adlawa, gisulod na usab sila ug kawatan ug posibling gibalikan pag usab aron kawatan.
Sa karon nagpadayon ang gihimong imbistigasyon sa kapulisan ug sa BFP Gensan kalabutan sa maong insidenti.
