Nasunog ang 2nd floor nga bahin sang Sunstar Commercial nga nahamtang sa Magsaysay Avenue, Barangay Poblacion, Tacurong City pasado alas 7:00 kagaina sang aga, Hunyo 2, 2018.
Suno kay Fire Officer 2 Nicanor Pagulong, fire investigator sang Bureau of Fire Tacurong City naglab-ot sa ikaapat nga alarma ang sunog kag malapit man sa apat ka oras antes nadeklarar nila ang fire out tungod mga plastic wares ang yara sa 2nd floor sang establishemento.
Wala naman sang narekord nga casualties sa nasambit nga insidente tungod tigayon man nga nakaggwa ang mga empleyado sa nasambit nga establishemento matapos nga bag-o lang ini nagbukas.
Ginabulubanta nga nagalab-ot naman sa P15 million ang natuga nga danyos sang sunog suno kay FO2 Pagulong tungod nasalbar man suno pa ang ground floor sang establishemento.
Nagrespondir naman ang lima ka mga firetruck sang mga banwa sa Sultan Kudarat lakip na ang firetruck sang Chamber of Commerce sa Koronadal City.
Sa subong nagapadayon pa ang imbestigasyon sang Bureau of Fire Tacurong City sa nasambit nga insidente kon ano ang ginhalinan sang kalayo nga naglamon sa ikaduha nga panalgan sang Sunstar Commercial.
Ginkumpirmar man ni FO2 Pagulong nga sang nagligad nga semana tatlo man ka puluy-an ang nasunog sa bahin sang JC Montilla kag nagalab-ot sa P300k ang natuga nga danyos.
