Buo ang suporta ni House Assistant Majority Leader at Ako Bicol Partylist Rep. Raul Angelo “Jil” Bongalon sa isinusulong ni Deputy Speaker and Quezon Rep. David “Jay-jay” Suarez na pagpasa ng supplemental budget para mapunan ang ₱9 billion na kulang sa pondo ng Pantawid Pamilyang Pilipino Program (4Ps).
Una nang sinabi ni Representative Suarez na supplemental budget ang maaring solusyon sa umano’y tinapyas na ₱13 bilyon ni Senator Imee Marcos sa 4Ps fund kaya nasa 4 milyong mahihirap na Pilipino na benepisyaryo ng programa ang hindi na nakatatanggap ng ayuda.
Sang-ayon din si Bongalon na ang 4Ps ay isang batas na dapat maipatupad kaya hindi ito maaring tanggalan o bawasan ng pondo.
Ang hakbang nina Suarez at Bongalon ay makaraang ihayag ni Department of Social Welfare and Development Sec. Rex Gatchalian sa pagdinig ng House Committee on Public Accounts at Committee on Social Services na inilipat umano ni Sen. Marcos ang ₱13 billion na pondo ng 4Ps noong 2023 sa ibang programa tulad ng CALAHISIDS, AICS, at quick response to calamities.
Giit ni Bonggalon, hindi dapat kunin ang nakalaan para sa mga maralitang pilipino dahil tiyak na maaapektuhan ang pag-aaral ng kanilang mga anak at wala silang magpagkukunan ng panggastos para sa araw-araw nilang pangangailangan.
