Supplier sang majiuana sa High School student dakop

289

BACOLOD CITY – Ginahanda na karon ang kaso nga igapasaka batuk sa isa ka suspek nga ginaalegar amo ang naga supply sang marijuana sa mga estudyante sang isa ka high school sa Brgy. Mansilingan.

Ini matapos nadakpan sa buybust operation sadtong Martes, Agosto 7 las 5:30 sang hapon ang suspek nga si Ronnie dela Cruz, 23 anyos ang edad, pumuluyo sang Hermelinda Homes, Brgy. Mansilingan, Bacolod City.

Ang buybust operation ginpatigayon sang mga katapo sang Police Station 7 kag nakuha sa possession sang suspek ang 6 ka putos sang marijuana nga ginabulubana may market value nga kapin P14 mil pesos.


Ginpahayag nga si dela Cruz ang ginaalegar amo ang ginkuhaan sang supply sang marijuana sang isa ka 17 anyos nga estudyante nga nadakpan man sang amo nga adlaw nga nagahupot sang ginadumilian nga druga.

Angut sini, ginpahayag ni Police Station 7 commander Police S/Insp. Ramil Sarona nga ang pagkadakup kay Dela Cruz ang resulta sang ila padayon nga monitoring kag follow-up operations.

Suno kay Sarona nga ginatinguhaan sang iya estasyon nga matumod kon bala sin-o kag diin naghalin ang marijuana agud madakpan sa mas madali nga panahon ang iban pa nga mga suspek.



Sa pihak nga bahin, may mga impormasyon nga nagasiling nga ang supply sang marijuana ang naghalin pa sa banwa sang Salvador Benedicto./dyHB BACOLOD

Facebook Comments