Supply it paeay ag bugas sa Aklan, bastante sa pihak kung banta it COVID-19

19

Kalibo, Aklan – Bastante rong supply it paeay ag bugas sa probinsya it Aklan sa pihak kung banta it COVID-19.
Ray rong ginpahayag ni Hon. Soviet Russia Dela Cruz, Committee Chairman on Agriculture it SP Aklan sa pakikipag-angot kana it RMN DYKR Kalibo.
Suno kana nga sa ginpatigayon nanda nga meeting kung gobyerno probinsyal it Aklan kaibahan rong NFA-Aklan parte sa food security preparation angot man sa krisis nga ginapangatubang makaron hay ginpahayag it NFA-Aklan nga bastante rong supply it paeay ag bugas sa Aklan.
Ginpahayag man dugang suno kana it NFA-Aklan nga sa makaron hay may stocks sa bodega nanda nga 95,000 ka sako it paeay ag may 3, 600 ka sako it milled rice (bugas).
Sigidas man makaron rong pagpamakae kung NFA-Aklan it limpyo ag uga nga paeay sa hayga nga P 19.00 kada kilo.
Sa makaron naga usoy man rong NFA-Aklan it marentahan nga bodega sa banwa it Lezo ag Makato para nga himuon nga extension ag mabutangan it mga binakae nga paeay.
Mag-eowas sa mga stocks nga paeay sa bodega it NFA-Aklan hay anda man nga namonitor nga maabo pang mga paeay nga tinipon rong mga pumueoyo.
Sa makaron suno kay Hon. Dela Cruz hay medyo ginakueang eamang kita sa supply it itlog, ag karne it baboy nga husto eamang raya sa local consumption bangud nga uwa man it ginapahinugutan nga maipasueod ro mga karne nga halin sa ibang lugar bangud man sa banta it African Swine Fever ukon ASF.

Facebook Comments