Davao City- Alang kang Marilog Barangay Salaysay Kapitan Robert Itdang, mas nagsulti sa tinuod ang kapulisan itandi sa survey result nga gipagula sa Social Weather Station ning baguhay lang.
Migawas sa survey nga 54% sa mga pinoy nag-ingon nga dili sila motuo sa bersyon sa mga pulis nga misukol ang mga drug suspek mao napatay sa anti-drug operation.
Sigun ni Kapitan Itdang, dili makahimo ang kapulisan sa pagpusil kung wala musukol ang drug suspek kay kung ila kini himoon sama ra nga ila giilad ang katawhan ug si PRRD.
Aminado si Itdang nga sa iyang obserbasyon posible dili tanan namatay misukol sa mga pulis busa nagbilin gihapon kini og pagduda batok sa mga pulis.
Apan wala kuno nagpasabot nga gamiton na ang resulta sa SWS aron hukan ang mga awtoridad nga ilang gituyo pagpatay ang mga nalambigit sa droga.
Dako ang pagtoo ni Kapitan Robert Itdang nga kasaragan sa napailawom sa survey kadtong mga pamilya nga naligsan sa kampanya kontra droga sa gobyerno.
Busa kung migawas man nga kapin katunga sa mga pinoy nagsulti og negatibo sa giyera kontra droga usa lamang kini ka normal nga reaction ug dili na angay katingad-an pa.
RadyoMan Joel Viray
