Davao City – Dako ang pasalamat sa Ginoo sa usa sa mga survivor sa nahitabong bangga sa Astorga, Sta. Cruz, Davao del Sur niadtong adlawng Domingo nga miresulta sa pagkamatay sa 14 katao.
Sa ekslusibong pakighinabi ni RadyoMaN Don Pulayao atol sa programang Kuskos Batikos sa DXDC RMN Davao kang Benjie Lumanta, 30 anyos nga taga Sto. Tomas, usa sa mga survivor sa mga sakay sa Hino, sumala niya nga sakit sa iyang buot nga nawala na ang iyang mga kauban sa trabaho nga adunay mga nabiling mga minahal sa kinabuhi apan nagpasalamat siya sa Ginoo nga gihatagan pa siya og ikaduhang kinabuhi human sa mapait nga insidente.
Nasayran nga padulong unta sila sa Darong Franklin Baker aron muduty gikan sa Coronon Franklin Baker diin iyang gibutyag nga usa siya ka utility man sulod pa lamang sa upat ka bulan sa maong kumpanya.
Samtang gibutyag ni Lumanta nga kusog matud pa ang padagan sa driver nga giilang si Efren Presores diin nakamatngon pa siya nga miuntol og ikaduha ang sakyanan sa dihang nahitabo ang aksidente apan nawad-an na siya og panimuot human mibangga ang gisakyang Hino sa truck.
Sa karon padayon pang nagpaalim sa Southern Philippines Medical Center (SPMC) ang maong survivor human nakaangkon og gasgas sa mga bukton ug tiyan hinuon gibisita na siya matud pa sa mga personahe sa ilang kumpanya ug misaad nga abagahon ang mga galastuhon sa ospital ug makabalik pa sa trabaho sa kumpanya og makarekober na.
RadyoMaN Don Pulayao
