Patay ang usa ka suspek sa kasong frustrated murder human ni-ambak samtang sakay sa patrol car sa Don Carlos Municipal Police Station, niadtong nakalabay nga gabie.
Sa interview sa RMN Malaybalay ngadto kang Police Major Carlito Chua Jr., ang hepe sa Don Carlos Municipal Police Station gibutyag niini nga naila ang suspek nga si Joseph Saba, 26 anyos.
Matud ni Chua nga nahitabo ang aksidente samtang pauli na ang iyang gingsakpan kaubang ang suspek ug mga witness sakay sa patrol car sa Don Carlos, Bukidnon human nga na file ang kaso sa suspek sa Provincial Prosecutors Office sa Malaybalay City.
Subay sa findings sa attending physician sa Bukidnon Provincial Hospital sa Maramag nga nakasinati sa severe traumatic head injury secondary to fall si Saba nga hinungdan sa iyang kamatayon.
Gidepensa usab sa hepe nganong nakahimo pa kini sa pag-ambak gikan sa patrol car.
Gipasabot ni Major Chua nga sa ilang assessment dili flight risk ang mao nga suspek nagpasabot nga wala nila nakita nga musibat kini maong wala na nila kini giposasan sa bangko sa patrol car.
Sigun sa hepe nga kalit kining misipa sa pulis nga mi-escort kaniya sakay sa mahindra patrol car.
Wala usab nila damha nga maghikog ang suspek.
Nasayran nga nag-atubang sa kasong frustrated murder ang suspek human nga nangluba niadtong Disyembre 27, 2019 tungod kay ilawom kini sa ilimnong makahubog.
Aminado usab ang hepe nga unang kaso kining natala sa ilang police station nga adunay naghikog gikan napasakahan ug kaso.
