Nahulog ang usa ka 10 Wheeler Truck sa pangpang sa ALalum Falls nga nahimutang sa P-6, Kisolon, Sumilao, Bukidnon kagahapon sa buntag.
Sa imbestigasyon sa Sumilao Municipal Police Station gibutyag niini nga gimaneho ang FUSO 10 Wheeler Truck, ni Raymart Briones nga taga P1B Barandias, Pangantucan, Bukidnon.
Ang mao nga truck gikan sa Maramag, Bukidnon paingon sa lungsod sa Baungon.
Saysay sa driver nga samtang naglatas kini sa national highway, pag-abot sa Alalum Bridge kalit lang na-lock ang manobela sa iyang gimaneho ug wala na niya na control pa.
Tungod niini nahagbong ang truck sa 50 metros nga gitas-on nga pangpang.
Swerte usab nga walay namatay sa mao nga aksidente hinoon nakasinati lamang ug minor injury ang driver ug ang truck helper nga si Romulo Briones, nga taga Maluko, Manolo Fortich, Bukidnon.
Dali usab nga gidala sa Bukidnon Provincial Medical Center, Malaybalay City ang duha aron katambalanan.
Samtang gikonsideran usab nga totally damage ang truck nga nahagbong sa pangpang.
Tungod niini gimando ni PCol Roel L Lami-ing sa Sumilao MPS nga istriktong ipatuman ang balaod trapiko ug pagpahigayon sa Random checkpoints para sa kaluwasan sa mga bumibiyahe.
