Polomolok, South Cotabato–Dead on arrival sa Polomolok Municipal Hospital ang usa ka Totong Alisin, hamtong ang panuigon nga nanimuyo sa Barangay Palkan, Polomolok, South Cotabato human nga napusilan sa mga personahe sa Polomolok Police human kining nangilog ug pusil sa usa ka pulis samtang sakay sila sa Patrol Car padulong sa Polomolok Municipal Police Station ala 1:00 ang takna sa kaadlawon.
Sumala pa ni Police Col. Marvin Duadua ang hepe sa Polomolok MPS nga una nang nasikop ang nasangpit nga suspect sa gipahigayon nga manhunt operation sa Polomolok Police Station sa panimalay sa inahan niini sa may Prk Norcos, Barangay Poblacion human nga nakasibat kini sa iyahang gihimong pagpamusil sa mga sakop sa Polomolok MPS sa baranagay Palkan alas 10:15 ang takna sa gabie sa dihang miresponde ang kapulisan sa report nga adunay hubog nga tao sa maong lugar nga adunay dala nga armas.
Dugang pa ni Lt. Col. Duadua nga pagkita matud pa sa suspect sa patrol gilayon kining nagpabuto ug armas niini nga shotgun nga miresulta sa pag ka-igo sa usa ka pulis nga si Police Cpl. Albert Taculod sa iyahang likod nga daling nadala sa balay tambalanan ingon man pagkadamage sa blinker sa patrol car.
Gilayon nga nisibat ang suspect sakay sa iyahang motorsiklo hinungdan nga nagpahigayon ug hot pursuit operation ang kapulisan.
Pipila matud pa ka mga balay nga gituohan sa kapulisan nga gitaguan sa suspect ang ilahang nasulod ayha nila kini nasikop sa Barangay Poblacion.
Dugang pagbutyag ni Duadua nga sa ilahang pagsuta bag-ohay lang nakagawas sa Lanton City Jail niadtong milabay nga tuig ang suspect sa kaso nga pagsupak sa iligal nga droga, anaa man usab ang pangalan sa suspect sa drug watch list sa Polomolok MPS ug gika-ingon myembro sa Ansar Al Khilafa Philippines kon AKP nga naglambigit sa robbery hold-up, carnapping ug gun for hire.
Sa pikas bahin andam man usab si Police Lt. Col. Duadua sa unsa mang-imbistigasyon kung adunay pagduda ang pamilya sa nahimong kamatayon sa ilang kabanay.
Samtang dili usab kombinsido si Manang Ester ang inahan sa namatay nga si Totong nga nangilog ug armas ang iyahang anak hinungdan nga napusilan ug namatay.
Sumala pa niini nga imposible matud pa nga mailog sa iyang anak ang pusil tungod kay pagdakop matud pa sa nahisgutan giposasan ang kamot niini. Daku ang pag tuo sa ginang nga gituyo ug patay ang iyang anak.(Dave Silagan)
