General Santos City–Ilhan na sa Maitum PNP ang suspek nga mipatay sa biktimang si Nene Taka, 16 anyos nga taga Sitio Salidok, Barangay Zion, Maitum, Sarangani Province kansa una nang gipatay ug gisulod sa sako dayon gilabay sa hilit nga lugar sa Barangay Batian, Maitum, Sarangani Province niadtong nakalabayng simana.
Sumala ni Captain Rodel Javison, Hepe sa Maitum PNP nga sa kasamtangan tumbok na nila ang suspek apan nagdumili sa pagbutyag ang opisyal tungod pabilin pang gawasnon ang suspek.
Sa karon ila pang ginaandam ang kasong ilang ipasang-at batok sa suspek ug higayon nga mugula na ang warrant of arrest dili sila magduha-duha sa pagsikop sa nasangpit.
Gibutyag pa ni Captain Rodel Javison nga migawas sa pagsuta sa medico legal sa patayng lawas sa biktima nga wala nahilabtan ang nasampit. Kini gumikan wala may nakit-an tinailhan nga adunay nahitabong penetration.
Nasayran nga una nang gidudahan nga gilugos ang biktima gumikan hubo ang nasampit dihang kini nakaplagan. Hinuon sa karon nagpadayon pa ang gihimong imbistigasyon sa kapulisan sa posibleng motibo sa krimen.
