General Santos City—Takdang kasuhan sa Police Station 3 ang suspek nga si John Patrick Polo, Alias Fuji, 23 anyos, nga taga Barangay Bula, Gensan kansa suspek sa pagpanunggab patay sa biktimang si John Vincent Lopez, nga natigayon sa Aradaza Street, Barangay Lagao, Gensan alas 2:00 ang takna sa kaadlawon kagahapong adlawa.
Una nang nadakpan ang suspek sa may Crossing Conel, Gensan atol sa gihimong follow-up operation sa Police Station 3 alas 2:00 sa hapon kagahapong adlawa.
Nasayran nga nadakpan ang nasampit nga suspek human ni-chat kini sa usa ka babaye ug niangkon nga siya matud pa maoy miluba patay kang Lopez.
Sa pakighinabi sa DXMD RMN Gensan News Team ngadto sa suspek iyang gihimakak nga siya maoy nipatay sa biktima. sumala niini nga iya lang kining nasulti sa babaye kansa maoy nisumbong sa kapulisan nga siya maoy nipatay tungod gusto lang niining mag pa-empress.
Sumala pa sa nasampit nga ang mipatay gyud sa biktima mao ang iyang amigo nga ginganlan ug Winwin kansa misibat na karong panahuna sa wala sayring lugar.
Gihingusgan usab niini nga apil siya sa rambol apan dili siya maoy nipatay sa biktima. sa karon giandam na sa Police Station 3 ang kasong ipasang-at batok sa suspek kansa tingkagol na karon sa silda.
