Madalag, Aklan – Natigayon nga maaresto it mga taga Madalag PNP rong suspek nga nag eabo sa sangka Chinese national nga si Shi Ji Wu, 26-anyos ag sangke engineer it China Water International Inc. sa gina construct nga Hydro Power Plant sa Brgy. Ma. Cristina, Madalag, Aklan.
Ro suspek nakilaea kay Ramy Rufino, 27-anyos, transit mixer driver sa nasambit nga construction site.
Natigayon nga madakpan it mga kapulisan rong suspek matapos nga makabaton it impormasyon rong kapulisan nga rayang si Rufino hay nakit-an sa Brgy. Alas-as kaina it aga-aga.
Insigida nga nagresponde rong mga kapulisan ag na corner ra imaw rason nga nagsurender eon lang.
Sa imbestigasyon nasayuran nga ko Byernes, Nobyembre 17 hay uwa magsueod sa trabaho si Rufino pero pagkagabii hay nag adto imaw sa andang barracks para kunta magpaperma ko anang DTR ay sweldo pagka aga ugaling uwa raya pag permahi ko biktima.
Uwa magkaintindihan rong daywa rason nga linabo na rong biktima nga inigo sa abaga, ag dughan.
Matapos rong insidente hay dayon raya nga nga naeagyo samtang rong biktima gindaea sa Panay Health Care.
Kasong Frustrated Murder dong igapasaka kuntra kay Rufino.
