LA CARLOTA CITY, NEGROS OCCIDENTAL – Nagsungka na ang isa ka lalaki nga suspek sa pagpatay sa dalaga nga nasapwan na gid lamang sang nagligad nga adlaw sang Lunes, Nobyembre 19, sa kalog sa Hacienda Elena, Barangay Ayungon, ciudad sang La Carlota.
Si Abelardo Historiador III alyas Third, legal ang edad kag pumuluyo sang Purok 10, Brgy. 1, La Carlota City ang nagsungka Biyernes sang aga kadungan sa pag-ako nga siya ang nagpatay sa biktima nga si Merlyn Villamar, 26 anyos sang Brgy. Guintorilan, San Enrique.
Suno sa hepe sang La Carlota City Police Station, PCI Romeo Vargas nga gin-ako ni Historiador ang krimen kag nagsiling nga iya ginlampusan sang bato sa ulo si Villamar kag amo ang gintunaan sang iya kamatayon.
Wala man sang indikasyon nga ginlugos ang amu nga dalaga basi sa autopsy result apisar nga wala na ini sang bra kag luslos na ang iya nga short.
Bangud sini, ginpasakaan sang kaso nga murder ang suspek kahapon sa La Carlota City Prosecutor’s Office mga las 3:45.
Ang suspek detained na karon sa custodial facility sang La Carloa CPS kag natalana nga sayluhon sa BJMP./dyHB BACOLOD
