Suspek nga nagtiro sa jeepney driver dakop sa hot pursuit, babaye nga upod gincustody, motibo sang kremin pagpangimon

BAGO CITY – Dakop sang Bago City Police Station paagi sa hot pursuit operation ang lalaki nga amu ang nagtiro sang makaapat ka beses sa 37 anyos nga jeeney driver nga ginkilala kay Marlon Sixto sang KM 13.5, Barangay Taloc.

Nakilala ang suspek kay Frank Alvarez, 46 anyos sang Relocation Site, Baragay Lag-asan.

Las 6:30 sang nadakpan si Alvarez upod ang babaye nga ginhingadlan kay Aiza.


Si Aiza ang kasakay ni Marlon kag upod panaog sa Pulupandan – Bacolod nga jeep sa Crossing Kamatis sa diin pagkatapos sang kremin, nagsakay man ini sa motor ni Frank.

Pangimon ang ginalantaw nga rasun sang mga otoridad kon ngaa nga nahimo ni Alvarez ang pagtiro kay Marlon, nga may ara man gani asawa kag nagabusong pa.

Si Aiza ang ginasiling may bana man apang wala sang bata.

Sa pagpangusisa sang mga otoridad kay Aiza, wala siya sang ihibalo nga upod niya si Marlon sang amu nga tion sa jeep.

Nakibot lamang siya nga sang nagpondo ang jeep, gintawag siya ni Marlon kag ginhambalan nga mag-upod sa iya panaog.

Nagbalibad ini apang ginbutong siya ni Marlon panaog.

Didto na nga nakit-an sila ni Alvarez kag natabo ang pagtiro kay Marlon sang makaapat ka beses sa iya nga tangkugo.

Gilayon nga nagsakay si Aiza kay Frank gamit ang motorsiklo.

Narecover sa crime scene ang isa ka baseyo, isa ka bala kag magasin nga may tatlo ka bala sang .45 kalibre nga pistola.

Karsel si Frank samtang gincustody lang anay ang babaye bangod padayon karon nga gina-establish kon bala may kaangtanan ini sa pagpatay kay Marlon.

Facebook Comments