Gilimod sa pamunuan sa provincial jail sa Lanao del Sur nga empleyado nila ang suspek nga nakuhaan og kapin usa ka milyon ka pesos nga kantidad sa gituohang shabu niadtong Domingo sa hapon.
Nadakpan sa usa ka checkpoint sa Barangay Tampilong sa Marawi City si Walid Usman nga sakay sa iyang motorsiklo nga maghatud unta sa iyang transaksiyon.
Gisundan, matud pa, kini sa mga operatiba sa Regional Drug Enforcement Unit 10 gikan sa Iligan City human makuha ang intelligence report nga aduna kini i-transport nga shabu.
Kapin kung kulang 200 gramos sa gituohang shabu ang nakuha gikan kaniya nga adunay estimate market value nga 1.3 million pesos.
Matud pa ni Lanao del Sur Provincial Jail Warden Acmad Tabao, posible matud pa’ng peke ang ID ni Usman nga adunay logo sa ahensiya, litrato sa suspek ug may pirma ni provincial governor Mamintal Adiong, Jr.
Giangkon ni Tabao nga kaila nila ang 32 anyos nga suspek tungod kay empleyado nila ang amahan niini isip computer encoder apan wala kini nahimong jail guard.
Una nang miingon si Lanao del Sur provincial police chief Col. Madzgani Mukaram nga kung mapamatud-an sa ilang imbestigasyon nga peke ang ID niini, lakip ang iyang driver’s license, pasakahan niya kini’g daghang kaso nga paglapas sa Republic Act 9165 o Dangerous Drugs Act.
Sa report sa information office sa Police Regional Office 10, usa ka high value target si Usman tungod sa daghang droga nga dala niini. (Divina M. Suson, March 10)
photo from PPO Lanao del Sur
