General Santos City—bantay sarado karon sa Dr. Jorge Royeca Hospital ang usa ka suspetsadong namusil ug barangay Kagawad didto sa Malungon, Sarangani Province human usab kining napusilan ug natigbasan sa mga residenti.
Ang suspek nailhang si Jonifer Zabala, 36, residenti sa Barangay Kiblat, Malandag, Malungon, Sarangani Province.
Alas 5:05 ang takna sa hapon kagahapong adlawa, Pebrero 27, 2017 dihang gipusil sa suspek ang usa ka Barangay Kagawad nga si Aden Roman, 53, residenti sa samang Barangay gumikan sa dili pagsinabtanay.
Nakaangkon ang biktima ug samad sa iyang tiyan ug sa iyang tiil kansa dali nga gidala sa St. Elizabeth Hospital sa iyang mga kabanay.
Samtang gumikan sa kalagot sa mga residenti sa maong barangay nga nakakita sa krimen, ila kining gitabangan ug kulata dayon gitigbas.
Wala pa makontento ang mga nahisgutan ila pang giilog ang pusil nga gigamit sa suspek sa pagpusil sa biktima ug mao usab ang gigamit sa pagpusil kaniya.
Nakaangkon ug daghang samad tinigbasan, bun-og ug samad pinusilan sa iyang ulo ang nasangpit nga suspetsado.
Sa karon bantay sarado ang suspek sa ospital ug higayon nga kini makarekober sa iyang mga samad ideritso na kini ug balhog sa silda sa Malungon Police Station.
Samtang alas 10:00 ang takna sa gabie sa samang adlaw dihang gipailawom na sa operasyon ang biktimang si Roman ug luwas na usab sa kuyaw nga kahimtang.
Ginahan-ay na usab sa Malungon PNP ang pagpasang-at ug kaso batok sa suspetsado.
