General Santos City–Gikumpirma ni Police Captain Samuel Bascon Jr. ang Deputy Station Commander sa Polomolok PNP nga pormal na nilang gipasakaan ug kasong trespassing ingon man sa kalapasan sa RA 10591 kon Illegal Possession Of Firearms And Ammunition ang suspetsadong si Junito Sirbolles, 36 anyos ,minyo, residente sa Purok Pag-Asa, Brgy.Cannery Site Polomolook, South Cotabato.
Saysay ni Bascon nga una na silang nakadawat ug tawag gikan sa purok chairman sa naasoy’ng Barangay nga dunay usa ka tawo nga misulod sa panimalay sa biktimang si Lea Pehaynon, 38 anyos, minyo ug nanimuyo usab sa nasampit nga lugar hinungdan nga gilayong gerespondihan sa mga personahe sa Polomolok PNP ang lugar.
Sumala pa ni Bascon nga atol sa paghidangat sa responding team sa panimalay sa biktima namatikdan nila nga ang suspek anaa na sa gawas ug kalit mibunlot sa iyang armas ug mipabuto ngadto sa kapulisan hinungdan nga gibalsan kini ug pusil sa otoridad nga miresulta sa pagkaigo sa suspek sa iyang tuong sikop.
Pagpaklaro usab sa opisyal nga niadtong higayona hubog ang suspek dihang pugsanon niining gisulod ang panimalay sa biktima nga dunay dalang armas ug nasayran usab nga ang suspek bag-o lang mibalhin ug puyo sa nasampit nga lugar.
Narekober sa kapulisan gikan sa posisyon sa suspek ang usa ka kalibre.38 nga matang sa armas, usa ka basyo ingon man duha ka duhing bala.
Sa kasamtangan nagpabilin pa sa balay tambalanan ang suspek nga nagpaalim sa samad niini.
