Davao City – Gipasaka na kaganinang buntag ang kasong rape with homicide batok sa suspek nga giingong milugos-patay sa usa ka 16 anyos nga dalagita sa Libby road, Bago Gallera ning syudad sa Davao niadtong adlawng Biyernes, Hunyo 22, 2018.
Kini ang gikumpirma sa hepe sa Talomo PNP nga si PCI Ronald Lao atol sa interview sa DXDC RMN Davao.
Samtang una ng gibutyag sa Davao City Police Office (DCPO) nga nag negatibo sa gipahigayong drug test ang suspek nga si James Narte, 35 anyos ug residente sa nasangpit nga lugar.
Dugang niini, gawas sa drug test, ginahulat usab ang resulta sa DNA sampling.
Apan bisan wala pa ang DNA result, gipasaka gihapon ang kasong rape with homicide tungod usab sa pipila ka mga ebidensya ug mga saksi sa maong panghitabo.
Gawas sa rape with homicide, nag-atubang usab kini og kasong Acts of Lasciviousness human nga nagpatala ang usa ka babaye ug gireklamo ang maong suspek tungod matud pa gibira ug gibastos kini.
Kahinumduman nga nasikop ang suspek niadtong adlawng Biyernes sa gabii ug gikumpirma sa Talomo PNP nga dili na kini person of interest kundi gitudlong suspek na sa paglugos-patay sa 16 anyos sa Bago Gallera.
RadyoMaN Renz Barbarona
