Suspek sa brutal nga pagpatay sa 12 anyos gikasuhan

Davao City – Kasong murder ug paglapas sa RA 9165 ang giduso batok sa suspek kinsa giingong nilugos-patay sa 12 anyos nga babae sa may Barangay Tibal-og, Sto. Tomas, Davao del Norte.

Sumala sa hepe sa Sto. Tomas PNP nga si Police Major Frederick Deles giduso ang kaso didto sa Tagum City Prosecutor’s Office og nipagula gilayon og resolusyon ang piskalya sa maong mga kaso batok sa 45 anyos nga suspek nga si Randy Labramonte, silingan sa biktima.

Gibutyag ni Deles, giangkon sa suspek ang krimen ug nag-inusara lang matud pa kini sa paghimo sa brutal nga pagpatay sa biktima.


Gikatakdang i-autopsy ang patayng lawas sa biktima karong adlawa.

“Sa pagkakaron kay wala pa man ta kabalo kung nahilabtan ang bata kay wa may medico legal, murder usa ang atong ipasaka (nga kaso),” sumala ni Deles.

Kahinumduman nga nakaplagan sa amahan sa biktima ang 12 anyos niyang anak kinsa wala nay kinabuhi sa irrigation canal alas 3:15 sa hapon niadtong Hulyo 25,2020 nga daghang samad sa ulo, nawong ug nakagapos ang tiil ug gihiktan pa ang liog niini.

Sa follow up operation nakuhaan ang suspek og usa ka pakete sa gituohang shabu.

RadyoMaN Aimee Guinita

Facebook Comments