General Santos City–Anaa na karon sa kustudiya sa Banga Municipal Police Station ang suspetsado sa pag-masaker sa usa ka pamilya sa Banga South Cotabato niadtong Myerkules sa gabie.
Gibutyag ni Police Major Joseph Forro- Hepe sa Banga Police Station, nadakpan ang suspek nga si Gido Blatang alyas Paul Bautista nga Taga Glan Sarangani Province sa checkpoint sa munisipalidad sa Norala.
Sumala ni Major Forro nga pagkabuntag human nahitabo ang maduguong krimen, gilayon nga nagtanyag og 200 thousand pesos nga reward money si Banga Mayor Albert Palensya alang sa pagkasikop sa suspetsado.
Gilayon nga mipahigayon og tracking ang kapulisan kaabag ang mga BPAT sa barangay aron pangitaon ang suspek. Misuway matud pa ug palayo sa lugar ang suspek ug nakasakay kini sa motor sa usa ka CAFGU paingon sa munisipalidad sa Norala.
Apan human namay-ungan sa CAFGU nga ang iyang pasahero mao ang suspek sa krimen nga gikapakatag ang hulagway sa social media, gilayon niining gitimbrehan ang checkpoint sa Norala nga miresulta sa pagkasikop sa suspetsado.
Patong-patong nga mga kaso ang atubangan sa suspek nga gilangkuban sa kasong parricide, murder og frustrated murder. Migawas usab sa imbestigasyon sa kapulisan nga kanhi na nalambigit sa krimen nga pagpatay sa iyang kanhing ugangan ang suspek sa pinuy-anan niini sa Glan, Sarangani Province.
Kahinumduman nga alas 6:30 sa gabii samtang dunay panagtigom ang magpamilyang Magno og Ramos sulod sa ilang compound dihang gipanigbas sa suspek nga miresulta sa kamatayon sa mga biktima. (JB)
