Davao City-Duna nay lead ang Davao City Police Office kun DCPO sa suspek kinsa nagbilin sa bag nga dunay mga high-powered firearms sulod sa bus.
Gibutyag ni DCPO Director PSSUPT Alexander Tagum nga pinaagi sa tabang sa mga saksi ug sa nakuhang CCTV footage, na-identify na ang suspek kinsa gilayong miikyas atol sa checkpoint sa Task Force Davao sa Licanan Brgy. Lasang Bunawan District, Davao City kagahapong adlawa apan wala nila gibutyag ang identity niini gani mihimo karon ang kapulisan og hot pursuit operation batok sa maong suspek.
Kahinumduman nga gibuhian na sa kapulisan sa Bunawan PNP kagahapong adlawa ang driver ug konduktor sa depasaheroan nga bus lakip na ang 26 ka mga pasahero human gi-hold alang sa imbestigasyon.
Sa pikas bahin, sa padayong pagpangita sa mga tinugyanan sa balaod sa usa sa mga pasahero nga posibleng gitudlo karon nga responsable sa bag nga dunay sulod nga mga high-powered firearms, ang Task Force Davao hugot ang pagrekisa ug pag inspeksyon sa mga sakyanan ug mga tao nga pasulod dinhi sa dakbayan.
Segun ni Task Force Davao Commander Col. Erwin Bernard Neri nga mutabang sila sa kapulisan sa paggukod kung kinsa man ang nagbilin sa maong bag.
Hangyo ni Neri sa publiko nga aron dili sila malangan, makigkooperar lang sa matag checkpoints kay kini alang sab sa kaluwasan sa tanan.
Panawagan sab niini nga magdoble igmat ug magbinantayon, kung dunay mga mamatikdang suspisyosong kagamitan o mga indibidwal nga ilang kasakay sa mga pampublikong sakyanan, ireport dayon kini sa mga awtoridad.
Kasamang Aimee Guinita
