Negros Occidental – Gintumod nga right hand sang isa ka drug lord sa ciudad sang Silay, Negros Occidental ang suspek nga nakuhaan sang P18 million nga balor sang shabu upod ang iya live-in partner sa Dumangas, Iloilo.
Sa isa ka interview kay P/Supt. Noel Polines, hepe sang Silay City Police Station, mag-abyanay ang suspek nga si Jose Alberto Pinaga, 32, sang Brgy. Mambulac, Silay City kag ang drug lord sang ciudad nga si Michael Divinagracia.
Suno sa iya, siyam na ka tuig nga naga-operate sa Silay si Divinagracia kag Pinaga kag childhood friends kag tupad balay pa ang duha sa nasambit nga barangay.
Pero wala madakpan si Pinaga sa ciudad sang Silay bangud sa Bacolod City ini naga-istar kag nagadagdag sang iya supply.
Samtang si Divinagracia naman ang napreso sang nagligad nga tuig pero nakaguwa sadtong Disyembre matapos magpiyansa sang halos tunga sa milyon ka pesos.
Dugang pa ni Polines, sa Metro Manila nagakuha sang supply ang mga ini kag halos kada semana nagabiyahe si Pinaga kag ang iya live-in partner nga si Maebelle Belmonte.
Matandaan nga nagpatigayon sang operasyon ang gintingob nga pwersa sang Iloilo Police Provincial Office, Negros Occidental Police Provincial Office, PDEA kag Philippine Coast Guard kag nakuha sa posesyon sang maglive-in partner ang isa ka kilo sang ginapatihan shabu.
———————-
For more news updates like our official Facebook page: www.facebook.com/ifmbacolod943
