General Santos City—tingkagol na sa silda sa Police Station 3 ang usa ka sikad driver human kining gisikop sa kapulisan gumikan sa reklamo sa iyang step daughter nga matud pagpanglugos ngadto sa iyang 4 anyos nga anak.
Suspek giilang si Unday Balindong44, sikad driver, residenti sa Prk. 8, Balite, Lagao Gensan.
Una nang mireklamo ang step daughter sa suspek sa Lagao PNP ug gisumbong sa iyang step father nga milugos matud pa niini ang iyang 4 anyos nga anak. Sumbong pa sa ginang nga mismong ang anak niining lalaki maoy nakakita nga gihilabtan sa suspek ang iyang manghod.
Alas 9:00 sa gabie sa nakalabayng adlaw dihang gisikop ang suspek didto mismo sa iyang panimalay ug gibalhog sa prisiohan.
Hugtanon usab nga gihimakak sa suspek nga si Balindong ang aligasyon batok kaniya. Sumala niini nga dili niya mahimo ang paglugos. Ang tinuoray nga nahitabo matud pa siya miuli nga hubog, siya miadto sa balay sa iyang step daughter aron mangape, gisugat kini sa iyang apo ug dayon nakigdula ngadto kaniya.
Tungod sakit iyang likod, siya namarayig sa iyang apo nga magpahilot, iyang gipatamak tamakan ang iyang likod sa bata apan natingala nalang siya nga siya gipasanginlan nang nanglugos.
Sa karon padayon ang gihimong imbistigasyon sa kapulisan kalabutan sa maong kaso. Samtang ginahulat nalang sa Police Station 3 ang resulta sa medico legal sa minor de edad aron sayron kung nahilabtan ba gyud ang biktima sa suspetsado.
