Sa interbyu sa DXDC RMN Davao kang Police Staff Sergeant (PSSg) Arman Baldove, personahe sa Buhangin PNP, gikumpirma niini nga namatay ang usa sa suspek human kini misukol sa kapulisan nga giilang si Aaron Kyle Tamano, 27 anyos, residente sa Purok 4-B, Barangay 23-C, Darussalam Boulevard, Davao City.
Sa imbestigasyon, mag-ala 1:00 sa kadlawon sa maong adlaw sa dihang nagpatabang ang biktima nga si Quency Rose Guimban, 18 anyos, estudyante, residente sa Malagamot, Panacan, Davao City, human kini gi-labnihan og bag sa duha ka suspects nga nag-motor partikular na sa CP Garcia Highway, Buhangin, Davao City.
Daling nagpahigayon og hot pursuit operation ang kapulisan ug na-corner ang mga suspek kung asa nagpaboto ang angkas niini gamit ang home-made revolver ug daling nakabalos ang pulis rason sa pagkaigo sa back rider nga suspek.
Gidala pa sa tambalanan ang suspek apan gideklara na kining dead on arrival ala 1:36 sa kadlawon. Narekober sa suspek ang bag sa biktima nga adunay cellphone, kapin libo nga cash ug uban pang personal nga gamit.
Nakuha usab sa posisyon sa suspek ang usa ka pakete sa gituohang shabu nga adunay estimated street market value nga P16, 000.
Samtang, dali usab nga nakasibat ang usa ka suspek padulong sa Purok Sta. Marina, Barangay Tigatto, Buhangin, Davao City.
“Nagpadayon gihapon ‘to ilang manhunt nga makuha pa ‘tong isa ka suspek,” sulti sa pulis.
RadyoMaN Kirby Manzon
