South Cotabato—Sikop sa Anti-Drug Operation sa kapulisan ang duha ka mga suspetsadong responsabli sa pagpamomba sa Koronadal City niadtong Abril 29, 2018.
Giila ni PNP 12 Regional Director Chief Supt. Marcelo Morales ang mga suspek nga silang si Sukarno ” Karno” Paidumama , residente sa Barangay Bulod, Sultan Sabarungis Maguindanao ug Alihan Dimasangkay Adtog, 31, residente sa Brgy Pimbalayan, Lambayong, Sultan kudarat.
Nasikop ang duruha atol sa gihimong buybust operation sa Purok Kings Barangay General Paulino Santos, Koronadal City niadtong Sabado sa hapon kung asa narekober gikan sa posisyon sa mga nasangpit ang usa ka granada, (3) ka sachet sa gituohang shabu, caliber .45 nga pistola, ug usa ka kinawat nga motorsiklo nga gipanag-iyahan ni Jonathan Lubos kansa una nang gikawat sa mga suspek sa Tantangan, South Cotabato niadtong Mayo 7, 2018.
Sumala ni Gen. Morales, nga si Paidumama maoy primary suspect sa nahitabong pagbusikad diin siya mismo maoy nagtanum sa bomba kilid sa simbahan ingon man ang bombang nakaplagan atubangan sa usa ka convenient store sa maong syudad.
Si Paidumama konektado matud pa sa grupong Bangsamoro Islamic Freedom Fighters (BIFF).
Gibutyag pa ni Gen. Morales nga basi sa Intel Report, nag-unang motibo sa mga nasangpit sa pagpamomba aron nga i-divert ang atensyon sa kapulisan aron nga ilang marescue ang lider sa Carnapping syndicate nga nabalhog karon sa silda sa Koronadal PNP.
