South Cotabato—Hilabihan ang pagmahay sa batan-ong suspek sa pagpanglugos sa 7 anyos nga minor de edad sa may Purok Lugan, Barangay Poblacion, T’boli, South Cotabato human sa iyang gihimo.
Sa pahayag sa suspek iyang gibutyag nga siya nagmahay nganong iyang gihilabtan ug gikulata pa ang 7 anyos nga biktima.
Kahinumduman nga una nang gibira sa suspek ang bata samtang nagbaktas ug gidala sa iyang girentahang boarding house ug didto na gihilabtan ug gikulata.
Nasayran nga didto mismo nakaplagan sa ginikanan sa bata ang nasangpit sa gipuy-an sa suspek maong gilayon sila nga nagreport sa kapulisan nga miresulta sa pagkasikop sa suspetsado.
Nasayran nga hingpit nang napasakaan ug kasong lugos ang suspek sa WCDP sa T’boli PNP human nga midesisyon ang pamilya sa biktima nga pasang-atan ug kaso ang nasangpit.
