General Santos City—nagpabiling atlarge sa kasamtangan ang suspetsadong nanigbas sa usa ka biktima nga natigayon atubangan sa National High School sa lungsod sa Alabel, Sarangani Province alas 2:30 ang takna sa kaadlawon sa nakalabayng adlaw.
Padayon pa karong gipangita sa Alabel Municipal Police Station ang suspek nga si Junie Lalisan, 20, residenti sa Purok 8, Barangay Ladol, Alabel, Sarangani Province suspek sa pagpanigbas ngadto sa biktimang si Bryan Borja, residenti sa Purok 1, Barangay Pag-asa, Alabel Sarangani Province.
Nasayran nga igo rang nagbaktas ang biktima atubangan sa National High School sa Alabel dihang kalit lang matud pang giduol sa suspek ang biktima dayon gitigbas igo sa agtang nga bahin niini.
Paspas nga gidala sa ospital ang biktima samtang ang suspek paspas sab nga misibat sa wala sayring lugar.
Sa karon ginahuwat pa sa kapulisan ang pamilya sa biktima alang sa pagpasang-at ug kaso batok sa suspetsado.
