Sa interview sa RMN Malaybalay ngadto kang Police Lt. Col. Ritchie Salva, ang Station Commander sa Malaybalay City Police Station, gibutyag niini nga nahitabo ang pagpangdunggab sa suspek nga si Darel Baliling Moralde, 30 anyos, ulitawo ug residente sa Barangay St. Peter, Malaybalay City ngadto sa mga mag-inahan nga si Anna Lee Dumala, 43 anyos, balo, ug Anjanette Gaco Dumala, 21 anyos, dalaga, kagahapon sa kadlawon.
Nasayran sa imbestigasyon sa kapulisan nga alas 6 sa gabie adtong Lunes, nag-inom ang biktima nga si Anjanette kauban ang iyang mga higala, hinigugma niini ug ang suspek tungod sa pagsaulog sa kapiestahan sa ilang barangay.
Apan alas 2:30 sa kadlawon kagahapon, nadiskubrehan na lang sa hinigugma ni Anjannette nga naligo na sa kaugalingong dugo ang mag-inahan.
Nasayran usab nga alas 2 sa kadlawon kagahapon, nakita ang suspek sa sulod sa kwarto sa dalagang biktima.
Matud ni Col. Salva nga nadakpan ra usab ang suspek sa ilang gihimong hot pursuit operation kagahapon kauban ang BPSO sa Barangay Busdi, Kaburacanan, ug St. Peter.
Narekober sa crime scene ang pito (7) ka pulgadang kutsilyo nga posibleng gigamit sa suspek sa pagpatay sa mag-inahan.
Sa karon anaa na sa kostudiya sa kapulisan ang suspetsado ug gi-andam na sa kapulisan ang kasong double murder batok niini.
Dugang pa sa hepe nga ni-angkon usab daw ang suspek sa gibuhat niyang krimen ug nabuhat matud pa kini niya tungod kay ilawom siya sa impluwensiya sa ilimnong makahubog.
