Davao City – Atol sa pagpakanaog sa bus driver sa iyang mga pasahero ug
gilayon gipusil patay kini sa wala pa mailhing mamumuno pasado alas 8 sa
buntag kagahapong adlawa sa Corner Razonable ug Pioneer St., Brgy.
Mankilam, Tagum City.
Ang biktima giila nga si Laurencio Saraum, 35 anyos ug taga-Purok Cacao,
Brgy. Sawata, San Isidro, Davao del Norte ug drayber sa Rheje Tour bus.
Sa text message nga gipadala sa DXDC team ni Tagum City Police Station
Spokesperson PSI Anjanette Tirador gibutyag niini nga blangko pa gihapon
ang awtoridad sa motibo sa pagpatay sa biktima ug pinaagi sa mga nakuhang
ebidensya sa crime ila kining subayon aron matudlo gayod kinsa ang suspek
nga responsable sa krimen.
“Wala pa po tayo clear na possible motives po kasi ang driver is not from
Tagum taga- Sawata,” matud ni Tirador.
Sumala ni Tirador wala pa usab nila nakuhaan og kabahin ang pamilya tungod
anaa pa kini sa kasubo.
“Iyong family po as of present di pa po nakipag cooperate, i-respect lang
po muna namin pag-mourn ng family,” segun ni Tirador.
Nakahiagom og samad pinusilan ang bus driver sa iyang liog ug kini maoy
rason sa iyang hinanaling kamatayon.
Nahipos sa mga kapulisan sa crime scene ang bala sa .45 nga baril ug
cartridge case ug ang maong mga ebidensya anaa karon sa istasyon sa Tagum.
RadyoMaN Aimee Guinita
