General Santos City–Samtang hugot usab nga gipanghimakak sa nasikop nga suspek nga si Jeorge Wenceslao, 42 anyos, minyo, kolektor og residente sa Phase 2, Litanville Brgy.Sinawal ning syudad nga dili iyaha kadtong mga droga nga nakuha sa otoridad sulod sa iyang panimalay atol sa operasyon sa pagimplementa sa search warrant ngadto kaniya.
Sumala pa sa suspek nga pasado alas 2:00 ang takna sa buntag niadtong adlaw’ng Sabado nakuyawan na lamang sila tungod kalit lang gisulod ilang panimalay sa kapolisan og gisipa ang ilang kwarto dala ang search warrant sa kalapasan sa RA 9165 nga gipirmahan ni judge oscar Noel Jr.
Atol sa maong pagsearch sa panimalay sa suspek nakuha ang walo ka sachet nga gituohang shabu sa operative team nga gibutang matud pa sa sulod sa cabinet.
Gipaklaro usab sa suspek nga kaniadto nalambigit kini sa illegal nga droga apan gumikan sa hugot nga kampanya sa kapolisan batok droga nakadesisyon matud pa siya nga magbag-o sa kinabuhi.
Nagtuo ang nasampit nga dunay tawo nga nangdaot kaniya hinungdan nga gipasanginlan siya nga maoy nagtudlo sa pagmaligya og ginadiling droga sa lugar. (Reynald Timario)
