General Santos City– giangkon karon ni Gensan City Councilor Atty Edmar Yumang nga nakaabot na buhatan ni Gensan City Mayor Ronnel Rivera ang sulat gikan sa buhatan sa Presidente sa Pilipinas bahin sa apila sa mga nagdumala sa STL kun Small Town Lottery.
Kahinumduman nga sa nakalabayng tuig una nang gibasura sa mga konsehal sa syudad ang operasyon sa STL sa Gensan tungod sa kakulangon sa mga requirement ug pagmagahi niini sa pagtuman nga mag-comply ug concurrence sa Sangguniang Panglungsod.
Sumala ni Kagawad Yumang nga Disyembre pa sa nakalabayng bulan nadawat sa syudad ang maong sulat sa diin naghangyo kini og konsiderasyon human ang pagbasura sa operasyon sa STL dinhi sa Gensan.
Gipasabot usab ni Kagawad Yumang nga ila na kining gihisgutan sa konseho apan sa iyang panglantaw isip abogado nga mas maayong himuon sa kompanya sama sa Trento Gaming Corporation nga una nang na-deny o nabalibaran ang aplikasyon mao ang subling pag-apply.
Matud niini nga dili na mahimong mapuslanon pa ang motion for reconsideration ilabi na kay dugay nang na-deny ang aplikasyon. Busa mas labing maayo kung mag-re-apply dala ang mga rekisitos aron subayon na usab sa syudad kung nakatuman na ba sa lokal nga ordinansya sa dakbayan. (Jordan Britos)
