Handa na ang syam ka mga eskwelahan sa rehiyon dose nga nalakip sa pilot testing sang limited face to face classes sa Nobyembre 15 subong nga tuig tungod plastado na ang precautionary measures batok COVID-19. Ini ang nangin pamahayag ni Department of Education 12 Information Officer Anton Maganto.
Suno kay Dep. Ed. 12 Information Officer Maganto, pito ka mga eskwelahan sa Saranggani kag 2 sa North Cotabato ang nalakip sa pilot testing sang face to face classes nga may manubo nga kaso sang COVID-19.
Pahayag niya nga mangin limitado ang numero kag bolontaryo ang partisipasyon sang mga estudyante sa patigayunon nga face to face classes nga magadugay sang tatlo tubtob masobra apat ka oras ang pagtinir sa eskwelahan sang mga kabataan.
Ginkumpirmar man ni Maganto nga ang mga manunudlo nga magadumala sa limited face to face classes ang kinahanglan nga fully vaccinated.
Sa datos sang DepEd.Central Office ang syam ka mga eskwelahan sa rehiyon dose nga nalakip sa pilot testing sang face to face classes amo ang Pag-asa Integrated School sa Alabel, James Chiongbian National High School sa Kiamba, Colon National High School sa Maasim, Maguling National High School sa Matium, Daan Suyan National Integrated School sa Malapatan, Baliton Elementary School sa Malungon kag Lamlifew IP Integrated School sa Malungon, Saranggani Province, Paco National High School sa Kidapawan City kag Bato Elementary School sa Makilala, North Cotabato.
