Pagadian City – Alas 8:00 karong buntag hingpit nang ipatuman ang Executive Order 19 Series of 2020 nga permado na ni Pagadian City Mayor Sammy Co ang pagpailalom sa tibuok syudad sa Enhanced Community Quarantine ug pag-amenda sa Executive Order 17 nga nagsibog na sa oras sa curfew alas 8:00 sa gabii hangtud alas 4:00 sa buntag.
Sugod usab karong buntag sitahon na mga menor de edad nga masakpan nga naglaroy-laroy sa syudad agig pagtamod sa polisiya nga 24-oras nga curfew sa mga nag-edad 17-anyos paubos.
Badlongon usab mga tiguwang nagpangidaron 65-pataas nga makait-ang nagpasaya-saya kay wala na kini tuguti nga makagawas-gawas bisan duna pay gihuptan Quarantine Pass.
Samtang base gihapon sa maong mando ehekutibo kontrolado na ang pagawas sa mga tawo nga dunay Home Quarantine Pass nga mopalit sa pagkaon ug medisina.
Matag adlawng Lunes, Merkules ug Byernes lamang pwedeng makapamalit o makaanhi sa syudad ang mga adunay home quarantine pass kinsa residente sa Urban Barangays nga naglangkob sa Barangay Balangasan, Balintawak, Banale, Buenavista, Bulatok, Danlugan, Dao, Dumagoc, Gatas, Kawit, Lenienza, Lumbia, Napolan, San Francisco, San Jose, San Pedro, Santiago, Sta. Lucia, Sta. Maria, Sto. Niño, Tawagan Sur, Tuburan ug Tiguma.
Samtang sa mga adlawng Martes, Huwebes ug Sabado ra usab ang pwede o gitugot sa kagamhanang local nga makapamalit sa city proper ang mga adunay home quarantine pass nga residente sa giilang Rural Barangays nga naglangkob sa Alegria, Baloyboan, Bomba, Bulawan, Dampalan, Datagan, Deborok, Ditoray, Gubac, Gubang, Kahayagan, Kalasan, Lala, Lapedian, La Suerte, Lison Valley, Lourdes, Lower Sibatang, Lumad, Macasing, Manga, Muricay, Palpalan, Pedulonan, Poloyagan, Tulangan, Tulawas, Upper Sibatang, White Beach, Bogo ug Kagawasan.
Dugang niini, walay gitugutan nga residente sa mga nahisgutang Barangay nga makapamalit sa adlawng Dominggo apan ang mga Frontliners kinsa gitahasan sa pag-implementar sa maong kamanduan mao lamang ang gitugutang makalibot libot dinhi sa syudad 24 oras sulod sa pito ka adlaw.
Kini nga mga lakang mga kasama gitumong aron malugway ug mapalapdan ang kamada sa gobyerno pakigbatok sa pagkuyanap sa Covid-19.
