ILOILO CITY – Napilian ang syudad sang Iloilo sang United Nations Children’s Fund (UNICEF), Australasian Society for Human Immunodeficiency Virus (HIV), Viral Hepatitis and Sexual Health Medicine (ASHM), kag Burnet Institute bilang isa sa mga pilot areas sa Pilipinas nga magpatuman sang Adolescent HIV programs.
Kasunod ini sang pagpasakop ni City Health Officer Dr. Bernardo Caspe sa seminar on “Innovative approaches and technologies to reduce adolescent HIV in China, Indonesia, and Philippines” sa Melbourne, Australia.
Suno kay Caspe isa ang Iloilo sa duha ka mga LGU sa Pilipinas nga imbitado sa seminar.
Tatlo ka mga best practices ang natun-an ni Caspe sa Australia sa pagpahagan-hagan sang HIV-AIDS.
Ginalakipan ini sang Community Rapid Testing Center, Pre-Exposure Prophylaxis kag Self-Testing.
Sa karon may testing nga ginatanyag ang Social Hygiene clinic sa Tanza City proper samtang ang pre-exposure prophylaxis kag self testing indi pa available sa Pilipinas.
Ginpahayag ni Caspe nga adolescents naman ang ila hatagan sang pagtamod bangud nagapabata na ang mga natapikan sang HIV.
