Buksan sang city government sang Koronadal ang panibag-o nga 105 beds capacity nga isolation facility sa bahin sang Marbel -1 Elementary School.
Ginpahayag ni City Architect Marvin Alegria nga ang nasambit nga tikang sang city government ang kabahin sang preparasyon sa padayon nga pagsaka sang kaso sang COVID-19 sa syudad.
Samtang plano man sang lokal nga panggobyerno nga ibutang sa nasambit nga pasilidad ang tanan nga mga magpaidalom sa home quarantine kag ang mga yara sa hotel facilities agud nga indi matam-an sa manpower sang mga nagamonitor nga health personnel.
Mamonitor man sang regular ang sitwasyon sang mga nagpositibo sa COVID-19 kon yara sa isolation facility sang gobyerno ang mga ini.
Dugang pa ni Alegria nga wala naman sang dapat nga kabalak-an ang mga taga- Brgy. GPS sa pagbukas sang nasambit nga pasilidad sa ila lugar tungod malayo ini sa mga puluy-an.
Ginsiguro man sini nga indi madisturbo ang mga manunudlo, mga ginikanan kag mga estudyante nga nagakuha sang ila nga mga modules sa operasyon sang pasilidad sa nasambit nga eskwelahan.
Ang Marbel 1 Elementary School ang makabig nga pinakadaku nga isolation facility sang syudad sa subong.
Samtang magluwas sa bag-o nga pasilidad, nagapabilin sa gihapon ang Saravia National High School kag Anawim Foundation bilang mga isolation facilities sa syudad.
