TABANG NAN THIRD PARTY FACILITATOR TAGHANGYO SA PAMILYA NAN TAGDAGIT NA DUHA KA PULIS SA BAD-AS, PLACER, SURIGAO DEL NORTE
Taghangyo kuman an tabang nan magsilbi na Third Party Facilitator para mapadali an pagbuhi sa duha ka pulis na sila ni P02 Alfredo Degamon Jr. ug P02 John Paul Doverte na tagdagit nan tagtuohang New People’s Army sa Bad-as,Placer, Surigao del Norte.
Sa suyat na tagpaabot pinirmahan nila ni Alfredo Degamon Sr., Jenet Vinial, Rouella Doverte ug Maruja Doverte, an amahan, asawa, pangasaw-anon ug inahan sa mga pulis, ila tag-angkon na sukad na tagdagit an mga ini adton Nobyembre 13, wayay ila balita o impormasyon na nakuha ugsa na sila nabayaka na sa ila seguridad, pisikal ug sitwasyon sa panglawas na miresulta na ini sa waya sila makatuyog ug waya na makapadajon sila sa normal na kinabuhi.
Sa ini na kalambuan, ila na tagpangajo an tabang sa Third Party Facilitator’s Group para sa dali na pagpanginlabot ug pagsilbi isip mediator sa pagbuhi sa ila ni P02 Degamon ug P02 Doverte. Dako an ila matud pa pagsalig sa Third Party Facilitator pinaagi sa Spokesman na si Atty. Victor Bernal labi na sa track record niini sa pagtabang na mabuhian an mga kanhi nagsilbi na Prisoners of War (POW) nan NPA, gani an tabang niini sauna sa mga na-release adton 2016, an unta mapaabot isab na pabor ngadto sa ila.
