TACLOBAN CITY – Waray koordinasyon an DPWH, ini an naging pahayag ni Engr. Felipe Picardal, Asst. City Engineer han Tacloban City Engineering Office ha problema nga ginakakaatubang yana han Tacloban, ini nga pagtaga-baha.
Kakulop natestingan na liwat an Tacloban han makusog nga pag-uran durot han bagyong Agaton, ha Nula-tula, nakukurian an mga motorista pag-agi tungod han malaksi nga pagtirok han tubig-baha ha kakalsadahan. Ha Apitong, an tubig-baha tikang ha bukid in nagpupundok ha Lolita Heights Village ngan Mountain side han Apitong, ha V&G naman, pagsugad hini nga makusog an uran maaram na hira nga mabaha ha ira lugar.
Sanglit, an pakiana han mga residente, san-o pa masosolusyunan ini nga mga pagbaha ha Tacloban?
Ha eksklusibo nga interview han RMN kan DPWH Tacloban sub-engineering District nga hi Engr. Arnaldo Bonifacio, sumala ha iya hain hira dapit nga diri nakikipag-cooperate ha City Engineering Office.
“Hain kami diri nakikipag-cooperate ha ira? Ngatanan ini in ginsasarit man ha ira, special permit adto ha ira, building permit adto ha ira, diri ako maaram kun hain kami diri na-cooperate. Waray ngayan gamit iton amon permit nga ginsusubmit ha ira.”
Ini ba in nagiging rason kun kayano diri la gihapon nasosolusyonan an pagtaga-baha ha syudad han Tacloban kay waray koordinasyon an duduha nga concerned agency.
Yana nga adlaw, makadto hi Engr. Bonifacio ha City Engineering Office para makalro ini nga ira problema.
Kami naman tikang ha RMN Tacloban ngan mga residente han syudad naglalaum nga masolusyunan na ini nga pagtaga-baha.
